Total Pageviews

Thursday, January 29, 2009

Goor, eksta goor.


Die skeisaak, loop nie goed af nie! Die gryle gryse goor weer, belemer 'n mens se toekomsuitsig en verhinder jou om die son te sien. Alhoewel jy weet die, son IS daar.

Ek het hierdie afgelope week, dinge ervaar en gevoel wat ek nie geweet het binne in 'n mens sit nie, en om eerlik te wees wil ek dit nie sommer gou weer ervaar nie. Here, asseblief nie gou weer nie! Ek smeek U asb nie gou weer nie!

Gee Here dat insig, kennis, en liefde in hierdie uur hoogty sal vier. Hierdie uur Here, hierdie uur. Die omstandighede by die werk is soos kanker, 'n mens voel almeer dat alhoewel jy wil veg, jy die stryd tog gaan verloor. Nee ag! en dit het niks te make met unie besluite of unie resolusies nie, maar meer een van heerskappy. Die verkeerde heerser heers die hart, en verstand van die meerdere, so voel dit vir my Here. Die verkeerde een. Help Here, gryp in. Help asb. Ek vra dit want my Hulp kom van die Here wat die hemele en die aarde gemaak het.

My studies.
Die week was maar 'n stil week in die studiefront, ek het darem die eerste twee hoofstukke se hele deurgang klaar beplan en is goed aan die vorder met hoofstuk twee. My promotor, is ook gelukkig met my vordering. Ek het baie nuwe bronne gekry, wat baie sal bydrae by die eerste twee hoofstukke. So in daardie aspek voel ek goed! Ek bid dat die onweerswolke sal ooptrek en dat ek opnuut motivering en inspirasie tap. Ek wil en ek gaan 'n sukses van dit maak. Tot eer van die Here, die gewer en skepper van alles! Kennis insluitend!

My swaar saak.
In hierdie aspek gaan dit ook nie sleg nie, as ek eerlikwaar kan terugraporteer. Ek probeer my bes om alle swaar vette uit my dieet te sny. Ek oefen by die gym, en probeer om die regte kos te eet. Dit is net vir my erg as mense nie verstaan nie. Mense begryp nie almal watse stryd dit is om nee te se vir iets lekker nie. My broer se potjiekos, is iets wat kampioenskappe sal wen. Die kampioenskap vir die lekkerste potjie asook die een wat die hoogste produkprysgebruik by Dairy-Belle of Clover sal kry vir die mildelike gebruik van room en allerhande sulke onskuldige bestandele. (HaHa).

Ek weeg weer volgende week en sal dan weer terugvoer gee.

Dit is swaar om dom te wees, en dom om swaar te wees. Ai tog! Die vet weet!

Teologies, geestelik.
Die Here is groot en goed, aan Sy onbegryplinge liefde is daar geen einde nie!

1 Pet 3: 15-16 In julle harte moet daar net heilige eerbied wees vir Christus die Here. Wees altyd gereed om 'n antwoord te gee aan elkeen wat van julle 'n verduideliking eis oor die hoop wat in julle lewe. Maar doen dit met beskeidenheid en met eerbied vir God. Sorg dat julle gewete skoon bly, sodat diƩ wat julle oor julle goeie lewenswandel in Christus belaster, daaroor skaam kan kry dat hulle kwaad van julle gepraat het.

Ek is amper klaar met die preekboek van J Edwards, en sal dan meer inligtig gee. Ek weet ek is nou al lank besig, maar ek bestudeer die boek (Eintlik die preek in die boek) deeglik.

Ek het 'n DVD gekyk oor hoe die Hubble Teleskoop dinge optel in die hemelruim wat die Big Bang Toerie teenstaan. Gaan kyk by: http://store.nwcreation.net/hububigbaint.html
Die DVD is 'n bietjie tegnies, maar tog het ek dit verstaan.

Ek beplan om later my eie geloofsbelydenis te skryf aan die hand van die twaalf artikels en dan hier op my klein stukkie kuberruimte te plaas.

Een van my beste boesemvriende het vir my 'n boek geleen van Ds Solly Ozrovech geleen, ('n Seisoen van Genade) Ek het 'n paar stukkies uit die boek al verslint, en is God baie dankbaar dat hy Ds Solly as so 'n kragtige literere mens laat onwikkel het, met 'n noemenswaardige skryfkuns van uitnemendheid. Ek sal later ook meer oor die boek skryf.

Ek kon nog nie die videos van Dr John MacArthur klaar kyk nie, ek wil graag dit op die TV kyk en nie op die laptop nie. Soek nog die regte program vir die omskakeling.

Om oor dankbaar te wees.
Ek het werklik baie baie dinge om oor dankbaar te wees, en het besluit om hierdie plakruimgedagte af te sluit met 'n paar waarvoor ek dankbaar is.

Ek is dankbaar vir 'n Pa wat alhoewel ons in baie opsigte verskil, tog lief is vir my en ek vir hom. Ek is ook dankbaar vir die mens verhouding wat daar tussen my en sy vrou (Tannie Helen) onstaan en ontwikkel het. My deernis en liefde vir haar groei steeds.

Ek is dankbaar vir vriende, en vriendinne. Mense wat die Here ken en op wie se gebede ek altyd kan reken. Mense wat kilometers ver sal ry net om te se: "Pel ek is daar vir jou!"

Ek is dankbaar dat die Here aan my die genade bewys het om elke dag met 'n helder verstand op te staan, en nie enige ligaamlike gebreke te he nie.

Ek is dankbaar dat daar mense is wat nog 'n bemoeienis maak met God en Sy Woord, waarby ek baie leer.

Ek het soveel om voor dankbaar te wees. Tel jou seeninge tel hul een vir een..... en jy sal verbaas wees oor wat God verleen.

En kyk!....... Die wolke breek reeds oop.








Sunday, January 18, 2009

Skuins voor Kerktyd


Soos die meeste van julle seker uit die Titel van hierdie, gemoedsb-euitening van my kan sien is dit nou Sondag oggend. (Die tyd, en datum gee dit ook weg)

Vanoggend is ek nie lus om kerk toe te gaan nie. Seker omdat ek weet wie preek. (My ouma wat 'n groot rol in my Christelike opvoeding gespeel het, sou gese het: "As jy fout het met die prediker, dan is daar 'n gat in jou emmer") Daar steek baie waarheid in hierdie woorde van haar.
Ek het hierdie week, 'n preek van Dr John MacArthur van die Grace Community Church in Amerika afgelaai in 4 dele van YouTube af. Ek sien met afwagtig uit om die preekdele om te skakel na MPEG en dan te verander om op my DVD speler. Ek het werklik respek vir die prediker, asook sy denk en sieningswyse rondom die verkondiging, en die uitleef van die evangelie in vandag se tyd.

Die week is een as ek terugkyk, wat baie verskillende dinge opgelewer het dit was ook een waarin my gedagtes baie rondgedwaal het. Om te begin kan 'n mens seker se dat die week een was waar ek verder aan my studies gewerk het. En om eerlik te wees voel dit asof ek wel die mylpaal gaan bereik aangesien ek reg uit die wegspringblokke weggespring het. Ek sien verder ook kans om die studie voort te sit aangesien daar soveel lig hierdie week by my opgekom het tydens die deurwerk van artikels, en navorsing op die Internet. As jy hierdie blog van my lees, vra ek mooi dat jy vir my sal bid, dat die Here my die ywer sal gee om aan te gaan. [Hier het nou mense by my opgedaag, dit is Sondag Oggend 07:55am]

Maandag Aand 18:12pm

Ek het nie gister oggend se tikwerk voorgesit nie, en gaan dit nou doen. Vandag was 'n dag van gemengde gevoelens. Die dreigende staking by die werk, werk negatief teen en in my moreel, en gemoed in. (En ek dink nie ek is die enigste persoon wat so voel nie)

Hoe kan 'n mens opspring en teenspring, en weerstand bied teen dom-astrantheid? (Ek weet nie) So kom ons laat dit met smeking voor die Here oor.

Om terug te kom na Dr John MacArthur, en sy prediking (soos ek gister wou vermeld is iets wat ek dink) daadwerlik al hoe meer dringend nodig is in Suid Afrika. Alhoewel daar alreeds sekere gemeentes gestig is onder sy vaandel, het ek een probleem met die dienste (waarvan ek een bygewoon het. Dit het niks met die teologie in die dienste te make nie, maar meer m.b.t die formaat. Ek sal later meer daaroor se) dit beteken nie, dat ek dit nie oorweeg om na een van die gemeentes in SA oor te beweeg nie.

Gaan lees gerus meer oor hom by:
http://www.gty.org/
en
http://en.wikipedia.org/wiki/John_F._MacArthur

Ek sal meer inligting oor die preek van YouTube af gee as ek dit klaar gekyk het.

More, as die Here my spaar

More beplan ek om 'n afspraak met 'n swaartekrag-druk-op-die-aarde-gewigsmetings-aparaat (ook bekend as 'n skaal), na te kom! Ek het die afgelope twee weke my bes gepoog om gesonder te eet. En ek hoop dat my poging sal begin om vrug (of is dit nou gewig) af te werp. :-)

!!!!! Ek kry nie die videos na die DVD toe oorgeskakel nie !!!!

Dit is nou [Woensdag 15:41] en ek tik nogsteeds voort.

Ek het die afspraak met die skaal nagekom en het meer as 3% van my vorige ligaamsmassa verloor. Ek werk ywerig die week voort.

Ek sukkel werklik om die preke omgeskakel te kry, en gaan hulp en raad inwin i.v.m die saak.

Ek gaan hierdie nou "post", en sal later weer die "Blog" bywerk.

Cheers vir Eers, en Chow vir Now!

B











Monday, January 12, 2009

Geniet jy jou kos Meneer, geniet dit maar!!!



As 'n mens tog net party dae, iets soos 'n 'rewind' knoppie gehad het, sjoe watse wereld sou 'n mens nie dan in geleef het nie. Dink net.....
Vandag was een van die minder lekker dae in my lewe, die eerste vergadering by die werk was kata-nausi-isties (katastrofies en iets om van naar te word, hehe my eie woord). Die blote gedagte dat baie van die probleme waarmee ons tans sit soveel anders kon gewees het, wil 'n mens dryf na drank... Dit is nou as daar drank oor is in jou kabinet. Myne het nie.

Nee dit is nie ondankbaarheid nie, maar eerder 'n sameloop van baie terleurstellende gebeurtenisse. Maar nou ja, dit is iets wat totaal uit die meeste van onse hande is, en wat net ingrype van Bo kan verander.

Ek het vandag iets in my verstand gedoen wat ek nie gedink het ek ooit in my lewe sal doen nie. As iemand dit vir my 3 jaar terug gese het sou ek, my humeur vir die persoon en seker vir myself verloor het. Ek het in my verstand, met my werk geskei: Nee ek werk nog daar, en die werk kan verseker wees van harde werk, en pligsywer, maar my hart is nie meer daar nie.

My hart is tans opsoek na 'n nuwe tuiste, (eintlik 'n tuiste waar hy lankal moes wees!) Die lekkerste gedagte is dat ek weet dat terwyl ek nog leef my hart altyd welkom is by sy nuwe blyplek, en dit is aan die voetbank van my Here. By Lewensverryking seminare word daar 'n vergelyking getrek tussen die mens en sy lewens-sirkels, my sirkel was verbuig na my werk, en nie altyd na die regte dinge nie.

Dit is snaaks vir my: Deesdae en veral oor die laaste paar maande dink ek BAIE anders oor die lewe, ek het selfs al gedink aan my eie dood. Ja. Ek het myself die vraag afgevra: As ek nou moet sterf watter rede sal ek kan aanvoer om toegang tot die Hemel te verkry? Ek weet dat ek 'n kind van God is, omdat ek Jesus Christus, as my persoonlike verlosser aangeneem het, maar se-nou maar dat ons ook geoordeel gaan word, al is ons kinders van God, nee nie veroordeel gaan word na die Hel nie, maar veroordeel gaan word na, watter tipe lewe ons gelei het hier op aarde. Ek dink konstant aan die gelykenis van die Eienaar wat talente aan sy werkers agtergelaat het om mee te woeker, en die ou Haleluja lied "Moet ek gaan met lee, hande" suis ook gereeld in my gedagtes. Wat het ek doen tydens my genadetyd hier op aarde?

Op hierdie oomblik kom die teksvers wat ongeveer as volg lui: "Daar is dus geen veroordeling, vir die wat In Christus Jesus is nie" ook by my op, en dadelik terwyl ek hierdie woorde tik moet ek myself afvra, hoe baie keer wil ek regtig IN Christus Jesus wees, en hoe baie keer lewe ek asof ek in sy skaduwee wil loop? Skuus Here as ek baie keer afdwaal, en in my eie rigting inslaan, hetsy by die werk of in ander tereine van my selfsugtige lewe.

Die vraag wat seker ook nou op meeste van julle se gedagtes hang is, hoe pas die Titel van hierdie, gedagtebeplakkingsruimte nou in by wat ek tot nou toe getik het en wat jy nou lees? Wel die antwoord is eenvoudig ek het nognie by die titel se inhoud uitgekom nie, so laat ek dadelik begin:

Verlede Saterdag het Pieter (my vriend) sy 40ste verjaarsdagpartytjie gevier by die huis van sy ouers. Ek het vrywillig 'n patatrol of twee drie vir die partytjie belowe. Nadat ek die meeste van die bestandele (behalwe die patatas self) by 'n nabygelee Supermark bekom het, moes ek noodgedwonge 'n ander pad neem om by een van die groenteverkopers hier in my kontrei, patatas te koop. Die voordeel hieraan is dat dit reeds geskil is, en mooi skoon verpak word.

Terwyl ek nog opweg is na die verkoper, moes ek by meer as een verkeerslig stop. By een van die verkeersligte was daar 'n Blanke man (ek skat hom so tussen 40-50) wat besig was om te staan en bedel met 'n bord waarop sy hele lewensverhaal met 'n swart inkpen aangeteken was. Tesame met die letters op die bord was daar ook 'n samevoeging van karakters wat veronderstel was om te verduidelik hoekom hy eninge donasie sal waardeer. Ek het nie kans gekry om die hele vervolgverhaal te lees nie, maar toe ek by die verkeerslig stilhou kom die man met mening nadergestap. (Niks fout met die motoriese gedeelte van sy liggaam nie). Hy kyk toe vir my, en met die eerste oogkontak wat ons maak, besluit hy daar en dan: Nee die man gaan my nie help of iets gee nie, en uiter die volgende woorde konstant, hard en duidelik sodat van die ander motoriste dit ook kan hoor: "Nee Meneer, geniet jy maar jou kos meneer, geniet dit maar", hy herhaal sy woorde 'n keer of twee.

Ek is uit die veld geslaan, en die lig word groen vir my. My gedagtes op daardie oomblik was een van volslae verwondering, en misnoe, om te dink dat selfs bedelaars nou al taktiek gebruik om jou te laat sleg voel. Ek was sommer kwaad, genade hoe druf hy!

Oppad na die groenteverkoper, word ek rustiger. Daar aangekom, help en groet Lettie my vriendelik. "Goeie middag Meneer, hoe help ek jou vandag? Lanklaas gesien"
Lettie onthou my, ek koop gereeld geskilde groente by haar.
"Kan ek vyf pakkies patatas kry asseblief?"
Daar is net twee op die tafel.
"As meneer net so bietjie wag dan maak ons gou nog drie"
Ek glimlag!
Lettie en haar span spring weg, en begin om ywerig patatas te skil, en te sny.
"Hoe lank is jy al hier Lettie?" vra ek.
"Hoe meen meneer nou?", vra sy?
"Hoe lank verkoop jy al groente en vrugte hier?", vra ek weer.
"Sjoe meneer...." Sy kyk na een van die mense saam met haar en praat iets met hom in haar moeder taal. Die persoon beaam iets.
"Seker nou dertig jaar meneer, net op hierdie selfde plek". Sy glimlag.
Dit is nie 'n gewone een nie, maar een wat tog 'n mate van trots uitstraal, een wat jy kry as jy weet dat jy nodig is, en 'n daadwerklike eerlike lewensbestaan voer. Sonder om bakand te staan met 'n bord om jou nek.

Ek glimlag.

Sy glimlag terug.

Die pakkies is opgemaak. Hoeveel skuld ek jou vra ek?

Dit is R6.00 meneer vir 'n pakkie. My kop maak somme.
(Ek skuld haar dertig rand) Ek haal 'n twintigrand nood uit saam met 'n tienrand en 'n vyfrand stuk.

"Hou die kleingeld Lettie"

Sy slaan haar bejaarde hande saggies saam, om haar dankbaarheid te betoon.

Pretoria-Noord weet van Lettie, van die motors hou sommer op 'n streep agter myne stil. Die Noord ken haar al vir dertig jaar. Drie dekades, drie dekades se skil, verkoop en vervoer. Met 'n glimlag en met deernis.

Ek gaan my patatarol maak en hom geniet Meneer, glo my ek gaan!

B

Thursday, January 8, 2009

Skielik onder my UIT!


Ek was nog besig om hierdie, webtuiste oop te maak om aan te teken... En Toe.. En toe...
En Toe.... Toe breek die stoel waarop ek sit, onder my uit! Kaplaks val ek op die grond met my hele gewig op my mees vervulde gedeelte, en die voetstuk van die stoel is in twee. Genugtig!

Dit is nou regtig nie hoe ek vandag se gedagtes wou begin nie, maar so het dit toe begin. Ek is tans besig, om 'n boek te lees. Eintlik is dit 'n baie baie dun boekie, maar ek lees party van die bladsye twee keer, en het al vir die derde keer sekere gedeeltes gelees. Ek is sopas klaar met hoofstuk een, en wat nou met my gebeur het aangaande die stoel is presies iets wat in die boekie deur die skrywer op 'n sekere mate geillustreer wou gewees het.

Kom ek skryf eers so ietsie oor die boek self, die boek is 'n Afrikaanse vertaling van wat alombekend beskou word as een van Amerika se beroemdste preke, gelewer deur Jonathan Edwards.


Een van die punte wat die predikant maak is die feit dat die sondaar se voet enigetyd en onverwags kan gly. Hierdie gedate toe die stoel onder my uitgly was die eerste een wat by my opgekom het aangesien, ek net 'n paar minute vantevore weer deur die eerste paar punte in die boek gewerk het. Die boek, noodsaak 'n mens om weer te dink, en MET ERNS te dink aan jou eie verhouding met die Verlosser en waar jy met Hom staan?

Dit bring my by my tweede gedagte, seker die een wat ek van tevore my hoofgedagte wou maak op hierdie tweede gedagtetuistewereld van my, i.e. die stand van die Predikking in ons land met betrekking tot, die NG Kerk, spesifiek met verwysing na die tipes preke wat gelewer word, waaraan baie lidmate blootgestel word.

Ek het die volgende teorie: 'n Groot deel van die tradisionele NG Kerk lidmate hoor nie meer die tweede kant van die Evangelie nie!

Wat sal dit wees mag jy vra?

Wel die kant van die HEL! wat net so 'n waarheid is as die van die Hemel.

Daar word myns insiens nie genoeg klem gele op die eersgenoemde nie, bloot omdat ek dink dit te doen het met die volgende twee gedates:
  1. Die waarheid van die Hel staan nie meer die hedendaagse prediker aan nie. (Met verwysing na die oorhoofse NG Kerk Milieu) - Indien jy HEWIG en driftig met my oor hierdie saak verskil, vra ek jou om eers 'n klein eksperiment te doen: Tel hoeveel keer die woord Hel (of die sinonieme) daarvan in die volgende maand se preke gebruik word. Of gaan kyk sommer hoeveel maal is dit oor die aglelope jaar in die preke gebruik.
  2. Die Hel is nie meer vir die hedendaagse predikant 'n Werklikheid nie, en soek ook nie die Noodsaak van die verlossing nie. Weereens vra ek, hoeveel Waaragtige BEKERINGSBOODSKAPPE is die afgelope maand of twee in julle gemeente gepreek?
Ek skryf hierdie nie neer omdat ek net wil gal braak nie, NEE ek skryf dit neer omdat ek glo ek nie meer die enigste lidmaat is wat so voel nie! En ek soos baie ander is baie hartseer daaroor.

Hartseer omdat ek strek glo dat dit nie is waarop die kerk waarvoor ek steeds lief is aanvanklik gebou en gefundeer was nie. Die algemene NGK familie het nie meer predikers soos: Dr Willie Marais, Ds Danie Steyns, en Prof Kolie Kotzes nie. HOEKOM nie vra ek?
Dit is 'n vraag vir 'n heel ander keer.

Nou ja wat is die regte benadering tot hierdie dillema?

Wegloop? Ander kerk soek? Die kerk loop en slegmaak by ander?
NEE, NEE, NEE en WEEREENS NEE

Eerstens gaan ek hard bid, bid vir herlewing, bid dat Christus die gemeentes se oe sal oopmaak, en hulle verstand sal ophelder.

Dit is tog waarin ons krag moet le? Nie waar nie?

Gelukkig kan ek al die verandering in my eie gemeente begin raaksien, en daarvoor is ek baie baie dankbaar!

Tot volgende keer.

B
===============================================================================

Die volgende is 'n sinoptiese ekserp van die boek by:
Augustine Bookroom, in Pretoria
http://www.augustine.co.za/product_view.php?prod_id=4619

Sondaars In Die Hand Van 'n Toornige God
Edwards J.

Amerika se Beroemdste Preek.
Sondaars In Die Hand Van 'n Toornige God Die preek wat 'n hele stad omgekeer het Die gemeente van Enfield se reaksie op hierdie preek was absoluut verstommend: Edwards is telkens onderbreek deur uitroepe van "wat moet ek doen om gered te word?"

Jesus Christus het die deur van genade wyd oopgegooi en Hy roep almal om sy uitnodiging aan te neem. Jonathan Edwards skilder 'n helder beeld van die dilemma van elke sondaar en louwarm Christen. Deur sy woorde kan jy ontdek wat dit beteken om God te volg. Edwards beskryf op meesterlike wyse die twyfelagtige posisie van mense wat nie reageer op Jesus se aanbod van liefde en vergifnis nie.


Meer oor die preek by: http://en.wikipedia.org/wiki/Sinners_in_the_Hands_of_an_Angry_God
Most famously preached on July 8, 1741 in Enfield, Connecticut, "Sinners in the Hands of an Angry God", is Jonathan Edwards' most recognizable sermon.

===============================================================================

Tuesday, January 6, 2009

Melkskommel gedagtes!


Dink Dink Dink:

Tweede Subtitel: Bertie stof sy gedagtes af.


Vandag is een van daardie dae wat ek net nie aan die gang kon kom nie. En die rede, weet ek self nie.


Daar is vreeslik baie dinge wat deur my gedagtes kolk, dinge wat maal en wemel; En die ergste is, ek weet nie hoe om dit alles te hanteer nie. Watse goed maal en wemel? Wil jmy dalk weet? Wel laat ek so 'n paar punte noem:


1: Ek wil regtig werk aan my gewig en aan my fiksheid. Sover was ek gister en vandag gym toe, en die skaal was nie gunstig teenoor my nie. So toe besluit ek: Ek gaan myself verbind om, 14.7% van my liggaamsmassa te verloor. En ek sit my beste voet voor. Ek het besluit dat ek weekliks sal verbind om my vordering op hierdie blog te sit, en dus myself so te motiveer. So volgende week teen hierdie tyd behoort daar al nuwe inligtig te wees.


2: Ek het 'n paar boeke gekoop wat ek regtig wil lees, maar dit is asof iets my verhinder om dit regtig met ywer te doen, ek weet nie wat my verhinder nie, maar die lus voel of dit my heeltemal ontgaan het. Dit is hoofsaaklik Christelike boeke, wat ek self gekies het. Om my te motiveer het ek ook vir myself belower om volgende week op hierdie denktuise van my verslag te doen oor hoe ver ek vorder, en wat ek gevorder of tot dusver geleer het.


3: My studies, dit is darem die een aspek waar ek volkome positief is, ek wil en ek gaan en ek sal my beste voet voorsit. Hierdie week wil ek Hoofstuk 1 voltooi, tot op sy voorfinale fase. Dit is my doelstelling en ek sal dit doen. As die Here my spaar.


Dit is van die Dinge wat deur my kop maal. Verder is daar ook nog goed soos: My verhouding met die Verlosser, erens het iets, van my kant af skipbreuk gelei, en ek Bid werklik dat die Here, deur Sy gees aan my vernuwende ywer sal skep. Ek glo en vertrou so. En ek voel tans reeds beter, net omdat ek dit hardop vir myself gese het.


Ek weet dat hierdie 'posting' ek moet nog die woordeboek nader vir 'n mooi vertaling van die woord, nie die beste leestof is nie, maar noem dit sommer 'n bevestiging en 'n afstof van my gedagtes.


Maar nou ja, as die Here wil, trek ek more nog asem, en dan voel ek deur die Genade Beter, en dalk skryf ek dan daaroor.


Tot Later.


Bertie






Sunday, January 4, 2009

Maak 'n PATATROL. Aanbeveel deur die Hartstigting en Orgaanskenkersvereniging, 'n Weighless Top Ledewerwer!












So is dit dan nou ook! Male sonder tal is ek al gevra om my eie (en dit is werklik my eie) kreatiewe kosskepping se resep te deel. En hier is dit dan, met prentjies en al. Alvorens ek die resep gee moet ek eers die gekiedenis van hierdie ou beskeie, rolletjie gee.
Ek is woon gereeld 'n lewensverryking seminaar by, (as klankhulp, groepleier, en fotograaf). Hierdie seminare word meestemal aangebied te Midway Inn (Hotel) by Middelburg. Nou as jy nog nooit 'n seminaar bygewoon het nie, het jy werklik 'n agterstand in die lewe!!! Glo my.
Gaan besoek gerus Lewensverryking Seminare se Webtuise by: http://www.lewensverryking.co.za/

Dit is werklik iets om by te woon. Jy stap deur die Genade as 'n ander mens daaruit!

Terug by die storie, die Hotel waar die seminare aangebied word is befaam, vir hulle uitnemende kookvernuf, (soos ouma dit gemaak het!) daar is glad nie 'n ligte hand as dit kom by Botter, Room, en spek ens. as bestandele nie. 'n Mens eet jou behoorlik in 'n ander bloed en bloedvetgroep in, danksy Tannie Lenie en haar span. Ek beveel die Hotel ten volle aan.

Een van tannie Lenie se gunstelinge is 'n Pampoenrol, met 'n "Lemoen tipe" sous, wat nog elke keer 'n wenner is. Na een van my vele inskepsessies, vra ek myself af: "Hoe sal ouma Stienie se Patatas nie met so 'n deegie smaak nie?" En daar is die resep gebore. My ouma het Patatas altyd so toffietameletjieagtig gekook, 'n wenner vir elke kind wat nooit Patas geeet het nie.

Ek besluit toe een Sondag om my breinkind 'n probeerslag te gee, en die resultaat ...... My suster sit laat namiddag met die bak op haar skoot en eet dit 'oorskiet' met 'n lepeltjie, krap krap op!

WENNER! Ek het die resep al 'n paar keer, 'n paar keer te veel gemaak en dit is 95% van die Kere 'n wenner. En soos wat meeste van my resepte is, is daar nie presiese tye, en mates nie. Hoekom vra ek? 'n Presiese resep wat jy maak is nie jou eie nie, 'n mens moet so ietsie van jouself bysit by elke respep, elke probeerslag! Dit maak nie net die dis uniek nie, maar ook jou eie! En as jy hom die volgende keer nie weer presies so maak nie.... SO WHAT?

Hier kom die resep dus:

Bestandele
  • +/- 125g Botter
  • 500g Geel / Karamel Suiker
  • +/- 1 Kg Patatas
  • 1 Pakkie gemmerkoekies
  • +/- 125ml Room
  • 1 Today Blaardeegrol
  • 3 t Vanielje Geursel (Opsioneel)
  • 1 t Suurlemoensap (Opsioneel)
Metode

Kook die Patatas sag, en druk verder sag.
Maak die Koekies pap in 'n bak met kookwater en meng by die patatas.

Gooi die vanielje geursel, en suurlemoensap saam met die beslag.
Rol die blaardeegrol oop.

Smeer die beslag oor die deegrol.
Sny die helfte van die botter in stukkies in sit ewekansig op die beslag.
Strooi die Helfte van die Suiker oor.

Rol die deeg in 'n rol, en sit in 'n voorafgesmeerde bak.
Sit die res van die botter in die bak en strooi die res van die suiker rondom.
Gooi die room oor die rol.

Bak in 'n voorafverhitte oond totdat die suiker gekarameliseer het. (Toffie gevorm het)
Geniet, Smul en STOEL!
Tot later.

Bertie